Rochas Okorocha don mad again and nobody wan yarm am the koko. Ahh ahhn…which kain tin be dis na? Na I like dis one, I like dat one na him mad man take carry over load. With the way Rochas Okorocha just dey jump from one kolomental case to another, time go reach na confam mad man go be governor of Imo State. Abeg, wetin dey worry Rochas for him Medulla Oblongata?
Before na Ekiti State Governor na him be head of Kolo Governors, but Rochas Okorocha of Imo State don collect the baton come beat am hands down!
The tin wey dey mad me pass na the confidence wey Rochas take dey do the tins e dey do, like say na him own head correct and all of us na mad people.
Last year Christmas na so Owelle Rochas Okorocha go use millions upon millions go build the highest Christmas tree. Maybe him plan na to create another tower of babel. We still dey talk dat one, na so him craze come increase by 100 degrees, na so e go begin mould statue for people wey no send am.
Social media people wan craze wen dem hear Rochas Okorocha do Statue for Jacob Zuma of South Africa. We still dey shout, small time na so him unveil the second one for Madam Ellen Johnson-Sirleaf of Liberia. Tori wey reach our ear be say e use more than N1B take do that statue. Upon say e dey owe Salaries of workers for him state, Rochas no send anybody, e no even dey look Uche face, na so e go use all dat money take erect statue wen hunger dey fire people for Imo State!
In case you no know, Rochas na enterSHOWment governor! Na so e take go build schools for Imo State, paint the outside finish but no single chair, book or teacher dey the school. All dis one na make e for take picture put for Television and social media, make people say him dey work. But breeze don blow, fowl nyash come open.
Wetin dey pain me pass be say Rochas too get sweet mouth! If you plan say you wan go kill am and you give am 2 minutes to take yarn with you, the guy go fit use sweet mouth take show you reason why you suppose kill yourself instead. Na him sweet mouth and money wey miss road dey deceive am, wey e wan take be President for Naija. LOL my grand pikin go first get grey hair before that one happen!
Person wey no get single shame, na so e go dey disgrace him self. Dem go come tink say Imo people no get sense, but dem no know say Rochas no be full Igbo man….na cross breed.
We still dey shout on top the one wey e don do, na so Rochas go make him sister “Commissioner For Happiness” for Imo State. Which kain wahala be dis naa??? Next tin you go hear na say e don create “Commissioner For Statues”.
Oga if you wan dash your sister money dash am, which kain stupidity on fleek be dis one naa?? I swear I don tire for Rochas! I get many tinz to yarn, but I fit talk now him no go gree do my own statue. Make I sha close mouth dey look am, maybe one day e go recognize me, come erect my own statue too for Imo State. Imo State people I dey pray for una, una dooh ooh.